ივა ბერაძეს 80 წელი შეუსრულდა

ოფთალმოლოგსა და მედიცინის დოქტორს, პროფესორ ივა ბერაძეს 80 წელი შეუსრულდა.
„ნიუ ჰოსპიტალსი“ და „ოფთალმოლოგიის ეროვნული ცენტრი“ ულოცავს ბატონ ივას 80 წლის იუბილეს, უსურვებს დღეგრძელობას და მადლობას უხდის უდიდესი პროფესიონალიზმისა და პაციენტების მიმართ გულისხმიერებისთვის!
ივა ბერაძეს, მრავალწლიანი პროფესიული საქმიანობის მანძილზე თვალის დაავადებების მქონე ათიათასობით პაციენტისთვის აქვს ჩატარებული სამკურნალო პროცედურები.
ივა ბერაძის მოღვაწეობა დაკავშირებულია თბილისის სახელმწიფო ექიმთა დახელოვნების ინსტიტუტთან, სადაც ასპირანტურის დამთავრების შემდეგ განაგრძო მოღვაწეობა და ეკავა სხვადასხვა აკადემიური თანამდებობები - იგი იყო თვალის სნეულებათა კათედრის გამგე, ასევე ინსტიტუტის პრორექტორი სამეცნიერო დარგში. აკადემიური საქმიანობის მანძილზე შექმნილი აქვს 136 სამეცნიერო ნაშრომი და 3 მონოგრაფია. ამასთან, იგი არის 2 საავტორო უფლებისა და 18 სადისერტაციო ნაშრომის ხელმძღვანელი. მის მოღვაწეობაში გამორჩეულია 10-წლიანი წევრობა ევროპის ოფთალმოლოგიის ასოციაციაში.
ივა ბერაძე იყო მრავალი საკავშირო და ადგილობრივი სარედაქციო ჟურნალის გამგეობის წევრი. გახსნის დღიდან ხელმძღვანელობდა თვალის რესპუბლიკურ საავადმყოფოს - იგი იყო, როგორც ოფთალმოლოგიის, ასევე ოფთალმოლოგიისა და ნევროლოგიის ეროვნული ცენტრის დირექტორი, შემდეგ სამეცნიერო საბჭოს თავჯდომარე და სამეცნიერო სამსახურის უფროსი.
მის მოღვაწეობასთან არის დაკავშირებული მრავალი თანამედროვე მიკროქირურგიული ოპერაციის დანერგვა, რაშიც მას მიღებული აქვს სახელმწიფო პრემია. ივა ბერაძეს ასევე მინიჭებული აქვს ქალაქ თბილისისა და აშშ-ს ქალაქ ახალი ორლეანის საპატიო მოქალაქის წოდება.
„ოფთალმოლოგიის ეროვნული ცენტრის” თანამშრომლები სიყვარულით ულოცავენ პროფესორ ივა ბერაძეს და კიდევ მრავალი წლის ნაყოფიერ შრომას უსურვებენ ახალგაზრდა ოფთალმოლოგების აღსაზრდელად და პაციენტების საკეთილდღეოდ. „ოფთალმოლოგიის ეროვნულ ცენტრს” თვალის დაავადებათა მკურნალობის საუკუნოვანი გამოცდილება გააჩნია და ქვეყნის მასშტაბით ლიდერია ოფთალმოლოგიური პროცედურების, ქირურგიისა და დიაგნოსტიკის მიმართულებით. ცენტრი 2011 წლიდან „ნიუ ჰოსპიტალსში“ ფუნქციონირებს და საუკეთესო ოფთალმოლოგიური სერვისებით უზრუნველყოფს პაციენტებს, მათ შორის გადაუდებელი ოფთალმოლოგიური დახმარების მომსახურებას, რომელიც 24 საათის განმავლობაშია ხელმისაწვდომი.